ازاي عيلتي كلها عرفوا إنهم بقالهم سنين حاكمين عليا غلط؟؟
تقول صاحبة القصة:
أخويا كيفن اتصل بيا تاني يوم وفاة أمي وقالي "يا رب تبقي مبسوطة.. هي سألت عليكي قبل ما تموت.. بس طبعًا إنتي مكنتيش موجوده كالعادة"
أنا كنت عارفه إن كيفن سخيف كده من زمان.. بس المرة دي بجد أتوجعت من كلامه.. انا كنت في رحلة شغل لما صحة أمي انهارت فجأة.. وحاولت انهي كل حاجة وارجع لها وفعلًا رجعت.. ولكن على ما وصلت للمستشفى كانت أتوفت من ساعة..
كيفن بلغني إن الجنازة يوم السبت.. والمحامية هتجي عشان تقرا الوصية بعد الجنازة مباشرة.. وختم المكالمة بجملة "ها هتقدري تيجي والا المرة دي كمان هتبقي مشغولة برده؟"
في الجنازة خالتي أخدتني على جنب وقالت لي "انا كنت بشوف كيفن هنا طول الوقت لما بزور أمك.. وكان بيجيب لها ولاده الحلوين.. مهم جدًا إن الأطفال يعرفوا جدتهم"
كنت عايزة أصرخ فيها إني كنت بتصل بأمي كل أسبوع لمدة خمس سنين.. بس منطقتش.. هزيت راسي وسكتت..
بعد المراسم خالي وقف جنبي وقالي "انتي عارفه؟ الناس اللي معندهمش ولاد مش بيفهموا أهمية الأسرة بنفس طريقة الناس اللي عندهم ولاد.. كيفن خلف لأمك أحفاد.. ده كان حاجة مهمة جدًا بالنسبالها.."
عضيت لساني وسكتت بدل ما أقوله إني معملتش أسرة والا ولاد عشان كنت بدفع تكاليف علاج ماما طول السنين اللي فاتت دي..
ابن خالي جاب لي طبق أكل وقالي "انا شوفت كيفن قبل كده كذا مرة في محل البقاله اللي جنب بيت أمك.. هو دايمًا كان بيشتري لها حاجات.. انتي كنتي فين من ده كله؟؟"
كان ممكن أقوله إني بسافر طيران 6 مرات في السنه عشان أزور ماما وأعمل لها كل اللي محتاجاه.. وإني كنت متابعة كل دكتور وكل علاج أو إجراء طبي عملته خلال السنين اللي فاتت.. بس على الأغلب مالوش لازمه والا في فايده..
مرات كيفن جت تكلمني وقالت لي "كيفن كان بيقضي وقت طويل جدًا وهو بيعتني بأمك.. احنا اضطرينا نعيد ترتيب حياتنا كلها حوالين إحتياجاتها.. وده طبعًا أثر على عيلتنا جامد.."
كان ممكن أقولها إني صرفت على علاج ماما 60 ألف دولار.. من غير حتى ما أبلغ أي حد.. بس أكيد تضحية كيفن كانت أكبر بكتير..
كيفن بعدها كان معدي من جنبي وقال بصوت عالي عشان كل الموجودين يسمعوه "على الأقل جت وورتنا وشها.. ده غالبًا أكتر من اللي بناخده منها في العادي.."
المحامية وصلت واتجمعنا كلنا في أوضة السفرة بتاعة ماما.. عشان تقرا الوصية.. المحامية طلعت اللاب توب وفتحت ملف.. كيفن كان قاعد على راس الترابيزة وعلى وشه نظرة غرور.. كأنه ضامن اللي هيحصل..
المحامية بدأت تتكلم "البيت قيمته 450 ألف دولار.. لبنتها.."
الأوضة كلها سكتت مفيش حتى صوت نفس..
المحامية كملت "المدخرات.. وحساب الاستثمار قيمتهم 320 ألف دولار.. لبنتها برده"
كيفن قام وقف بسرعة لدرجة إن كرسيه وقع.. وبدأ يصرخ "ايه ده؟؟ ده جنان.. انا كنت هنا كل أسبوع.. لولايا كانت قعدت لوحدها تعفن.. وبنتها السافله دي ماكنش فارق لها إلا شغلها.. دي حتى لا متجوزة والا مخلفه.. هتعمل ايه ببيت 4 أوض؟"
مراته شدته من ايده وقالت "أكيد كل ده بسبب الدوا.. أكيد ماكنتش بتفكر بشكل سليم.. احنا هنرفع قضية"
المحامية هي اللي ردت وقالت "والدتك تم فحصها من 2 دكاتره قبل كتابة الوصية وفي تقرير طبي يثبت إنها كانت مسؤولة وواعية لكل تصرف بتعمله.. وده من 6 شهور بس لما حدثت الوصية.. وسجلت رسالة فيديو كانت موصيه العيلة كلها تشوفها يوم قراية الوصيه"
بعدها اختارت فيديو على اللاب توب ولفيته بحيث يبقى في وش كل الموجودين.. وضغطت "تشغيل"
ماما ظهرت على الشاشه.. كانت رفيعه جدًا.. ومرهقة.. بس شكلها واعي تمامًا لكل حاجة بتقولها.. بدأت تتكلم "لو انتوا بتتفرجوا على الفيديو ده.. ف أنا كده مت.. ومتأكدة إن كيفن على وشك يتجنن دلوقتي"
كيفن فتح بقه من الصدمه..
ماما ابتسمت وكملت "كيفن يا حبيبي تعالى اقولك حكاية صغيرة.. انت زرتني بالظبط 37 مرة في 5 سنين.. انا كنت عاملة قائمة حطاها على الكمودينو جنب سريري فيهم مواعيد زياراتك... كل زيارة كنت بتطلب مني فلوس.. 15 ألف عشان مطبخك لأنك مبقتش قادر تستحمل شكل الرخام.. 8 آلاف عشان عربية مراتك.. 12 ألف عشان دكتور الأسنان.. 5 آلاف عشان أجازة لهواي.. أكمل؟؟"
كيفن وشه من الأحمر بقى أصفر..
ماما كملت وقالت "أخر شهر جيت لي عايز 7 آلاف دولار عشان تغير الأنتريه بتاعك عشان الكنبه القديمة عليها بقعه.. جبت معاك ولادك وقعدوا يستخدموا تليفوناتهم طول الوقت.. محدش فيهم قالي كلمة واحدة.. وانت قعدت ادتني محاضرة طويلة عريضة إنك معاكش فلوس ومحتاج.. وبمجرد ما كتبت لك شيك بالمبلغ اللي طلبته اخدت عيالك وخرجت"
خالتي شهقت وهي بتبص لكيفن..
ماما كملت بصوت أعلى "بنتي كانت بتكلمني كل يوم حد الساعة 7 مساءا.. لمدة خمس سنين.. عمرها ما فوتت مرة.. حتى وهي عندها برد.. حتى وهي مسافرة عشان شغلها.. كانت بتسألني عن تفاصيل كل معاد عند الدكتور.. وكل تغيير في الدوا.. كانت بتيجي بالطيارة 6 مرات في السنه تزورني.. موجودة في كل إجراء طبي كبير الدكتور يطلبه.. كنت بفوق ألاقيها جنبي نايمه على كراسي المستشفى ومخلصه كل أجازتها عليا.. "
الدموع كانت نازلة على وشي من غير إرادتي..
ماما كملت "من سنتين بالصدفة عرفت إن اختك يا كيفن هي اللي بتدفع لي مصاريف علاجي.. عمرها ما قالت لي.. عمرها ما طلبت أي حاجة في المقابل.. عمرها حتى ما اتكلمت في أي حاجة خاصة بالفلوس دي.. ف نفس الوقت يا كيفن إنت طلبت مني فلوس 37 مرة.. وعمرك ما عرضت حتى إنك ترجع دولار واحد استلفته"
كيفن حاول يتكلم بس مقدرش يقول أي حاجة..
أخر جملة ماما قالتها "ف يا كيفن.. انت مش هتاخد أي حاجة.. والا قرش واحد من فلوسي.. مش عشان انا بطلت احبك.. لا.. عشان انت كنت مستعد تبطل تحبني في نفس الثانية اللي انا أبطل فيها أكتب لك شيكات واديك فلوس.. اختك هتاخد كل حاجة.. عشان هي الوحيدة اللي حبتني من غير ما تطلب سعر حبها ده.. أتمنى إنك تتعلم حاجة من اللي حصل.. بس بصراحة انت أناني أكتر من إنك تحس إن انت اللي عندك مشكلة وتتغير.."
الفيديو خلص.. كيفن بدأ يصرخ في وشي ويشتمني لدرجة إن مراته اضطرت تجره جر من البيت.. رفع أكتر من قضية عشان يرفض الوصية.. بس كل مرة كان بيخسر..
انا دلوقتي عايشه في بيت أمي.